Asociacioni i Komunave të Kosovës (AKK) ka kritikuar Ministrinë e Arsimit, Shkencës, Teknologjisë dhe Inovacionit (MASHTI) për mangësitë e evidentuara në ditën e parë të vitit të ri shkollor. Duke u bazuar në informatat e pranuara nga drejtorët komunalë të arsimit, ky asociacion ka theksuar se institucionet arsimore po përballen me mungesë të dokumentacionit të nevojshëm shkollor dhe kurrikular.
Sipas reagimit të publikuar nga AKK-ja, një numër i konsiderueshëm i nxënësve kanë hyrë në procesin mësimor pa tekstet shkollore. Për më tepër, bazuar në shqetësimet e përcjella nga prindërit, në disa raste mjetet financiare për blerjen e librave nuk janë transferuar ende nga ana e nivelit qendror.
Drejtori ekzekutiv i AKK-së, Sazan Ibrahimi, vlerësoi se këto obligime është dashur të përmbusheshin përpara fillimit të procesit mësimor. Asociacioni ka kërkuar nga Ministria e Arsimit që të ndërmarrë masa urgjente për zgjidhjen e këtyre problemeve, me qëllim që pasojat e vonesave nga niveli qendror të mos reflektohen te komunat, mësimdhënësit dhe nxënësit. Në reagim është theksuar se "arsimi nuk improvizohet" dhe se dokumentacioni e tekstet duhet të ishin të pranishme që në ditën e parë të mësimit.