Ish-presidentja e Republikës së Kosovës, Atifete Jahjaga, ka takuar përfaqësuesit e platformës qytetare "Liria Ka Emër", me të cilët ka diskutuar për rëndësinë e këtij marshi. Përmes këtij takimi, Jahjaga ka konfirmuar përkrahjen e saj për këtë ngjarje, e cila është dedikuar ish-krerëve të Ushtrisë Çlirimtare të Kosovës. Gjatë kësaj vizite, përfaqësuesit e platformës vizituan edhe muzeun "Çast", i cili përmes një qasjeje artistike dhe konceptuale pasqyron përvojat e viktimave të dhunës seksuale gjatë luftës, duke theksuar sfidat dhe stigmën që ato përballojnë në jetën e përditshme.
Ndërkohë, edhe aktori i njohur Edi Kastrati i është bashkuar thirrjes publike për pjesëmarrje në këtë marshim. Ai ka ftuar qytetarët që të jenë të pranishëm më 12 shtator për të mbështetur ish-krerët e UÇK-së. Organizatorët e "Liria Ka Emër" theksuan se ky marsh mbahet në prag të datës 16 shtator, me qëllim kërkimin e drejtësisë, lirisë dhe kthimin në atdhe të figurave të lartpërmendura. Pjesëmarrësit janë ftuar të mblidhen në sheshin "Skënderbeu" në Prishtinë, në orën 14:00, për të dhënë mesazhin e tyre mbështetës.
Përditësime
Këngëtari Shkëlzen Jetishi-Xeni i është bashkuar zyrtarisht listës së figurave publike që mbështesin organizimin e "Marshit për Liri". Artisti ka shprehur publikisht përkrahjen për nismën e platformës qytetare "Liria Ka Emër", e cila kërkon drejtësi për ish-krerët e UÇK-së që ndodhen në paraburgim në Hagë.