Administrata Tatimore e Kosovës (ATK) ka njoftuar se ka nisur zbatimin e Marrëveshjes ndërmjet Republikës së Kosovës dhe Republikës së Italisë për eliminimin e tatimit të dyfishtë dhe parandalimin e evazionit dhe shmangies tatimore në fushën e tatimit mbi të ardhurat.
Kjo marrëveshje synon avancimin e marrëdhënieve ekonomike ndërmjet dy vendeve dhe forcimin e bashkëpunimit në çështjet tatimore. Ajo eliminon barrën e tatimit të dyfishtë për individët dhe bizneset, duke kontribuar në krijimin e një mjedisi më të favorshëm për investime dhe zhvillim ekonomik.
Në të njëjtën kohë, marrëveshja adreson parandalimin e evazionit dhe shmangies tatimore, duke kufizuar përdorimin e skemave që çojnë në mosdeklarim apo deklarim jo të saktë të të ardhurave. Në kuadër të saj përcaktohen qartë personat e mbuluar, të cilët janë rezidentët e njërit ose të të dy shteteve kontraktuese, si dhe mënyra e trajtimit të të ardhurave për qëllime tatimore.
Marrëveshja trajton të ardhurat që burojnë përmes subjekteve apo aranzhimeve të ndryshme, në përputhje me legjislacionin përkatës të secilit shtet. Ajo siguron respektimin e të drejtave tatimore të shteteve kontraktuese dhe përcakton rastet kur përfitimet mund të aplikohen.
Sipas ATK-së, zbatimi i kësaj marrëveshjeje përbën hap të rëndësishëm drejt forcimit të bashkëpunimit ekonomik dhe rritjes së sigurisë ligjore për investitorët dhe bizneset që operojnë në të dy vendet.
Aktualisht, Kosova ka në fuqi 22 marrëveshje për eliminimin e tatimit të dyfishtë me shtete të ndryshme.