Pas një inspektimi të jashtëzakonshëm në subjektin përpunues të qumështit VITA, Agjencia e Ushqimit dhe Veterinarisë (AUV) njoftoi se ka konstatuar mospërputhje me legjislacionin në fuqi. Inspektorët kanë kontrolluar dokumentacionin, objektin dhe linjat e prodhimit për të verifikuar standardet e sigurisë ushqimore.
Sipas njoftimit zyrtar, megjithëse subjekti posedon autorizim për përpunimin e qumështit, në objekt janë gjetur linja për prodhimin e produkteve me bazë yndyrash bimore dhe proteinash qumështi, për të cilat kompania nuk posedon autorizim të veçantë. Gjatë kontrollit, inspektorët evidentuan sasi të konsiderueshme të lëndëve të para, përfshirë:
• Qumësht UHT
• Qumësht pluhur
• Proteina qumështi
• Hirrë qumështi
• Vaj palme
AUV theksoi se, për momentin, nuk ka vendim për ndërprerjen e veprimtarisë së subjektit. Mostrat e marra janë dërguar për analiza laboratorike, rezultatet e të cilave do të përcaktojnë konstatimet përfundimtare dhe hapat e mëtejshëm ligjorë. Pas përfundimit të procedurës, subjektit i është lëshuar urdhër për zbatimin e kërkesave të legjislacionit dhe udhëzimeve përkatëse të Ministrisë së Bujqësisë.
Përditësime
Kompania VITA ka ndërprerë përkohësisht prodhimin pas inspektimeve nga Autoriteti i Ushqimit dhe Veterinarisë (AUV) për shkak të mospërputhjeve ligjore. Menaxhmenti ka njoftuar ndalimin e pranimit të qumështit nga fermerët, ndërsa ministri i Bujqësisë, Faton Peci, ka konfirmuar zyrtarisht kryerjen e kontrolleve në këtë subjekt.