Ky artikull është përditësuar. Shiko përditësimet
Agjencia e Ushqimit dhe Veterinarisë (AUV) e Kosovës njoftoi opinionin publik për praninë e mundshme të aflatoksinës M1 në djathin Mozzarella të prodhuar nga qumështi i buallicës. Ky njoftim erdhi përmes Sistemit të Alarmimit të Shpejtë për Ushqim dhe Ushqim për Kafshë (RASFF) të Komisionit Evropian, me numër 2026.0032, më datë 7-8 janar 2026.
Sistemi RASFF njoftoi se produkti, me origjinë nga Italia, është shpërndarë në Kosovë, Kroaci, Gjermani, Hungari dhe Poloni. Prodhuesi është Caseificio Coop. “La Contadina” A.R.L., eksportuesi Cepparo S.P.A. i Italisë, ndërsa importuesi në Kosovë është Premio SHPK në Sllatinë e Madhe. Lote të prekura janë 25346, 25347, 25349 dhe 25350.
Burimet italiane, duke iu referuar Ministrisë së Shëndetësisë së atij vendi, specifikojnë tërheqjen e serive të Mozzarella di Bufala Campana DOP nën markat Contadina, Metro Chef dhe Tamburro. Këto produkte shiten në forma të ndryshme:
- Mozzarella di Bufala Campana DOP Contadina në gota 125 gramëshe dhe qese të mbyllura, me numër serie 25347 dhe datë skadimi 17/01/2026;
- E njëjta markë në qese 250 gramëshe dhe 5×50 gramëshe, me numër serie 25349 dhe datë skadimi 19/01/2026;
- Bukë e thurur Mozzarella di Bufala Campana DOP Contadina në pako 1 kg, me numër serie 25347 dhe datë skadimi 03/01/2026, si dhe në pako 2 kg dhe 3 kg me numër serie 25349 dhe datë skadimi 05/01/2026;
- Mozzarella di Bufala Campana DOP Metro Chef në tabaka 1 kg, me numra seri 25349, 25346 dhe 25350, dhe data skadimi nga 01/01/2026 deri në 05/01/2026.
AUV-ja thekson se, duke vlerësuar rrezikun e mundshëm serioz, po ndërmerr masa në përputhje me procedurat RASFF për të monitoruar rastin dhe tërhequr produktin nga tregu. Agjencia mbetet e përkushtuar për monitorimin e vazhdueshëm të tregut dhe zinxhirit ushqimor, duke zbatuar masa parandaluese dhe kontrolluese për të siguruar ushqim të sigurt për konsumatorët, në përputhje me standardet kombëtare dhe ndërkombëtare.
Përditësim
AUV ka izoluar 15 kilogramë djathë Mozzarella Bufalo të dyshuar për kontaminim me aflatoksinë M1. Procesi i asgjësimit të këtij produkti do të nisë së shpejti. Pavarësisht mungesës së inspektorëve, AUV mbetet e përkushtuar ndaj monitorimit.