Agjencia e Ushqimit dhe Veterinarisë (AUV) ka ndërmarrë veprime të shtuara mbikëqyrëse ndaj operatorit ekonomik Apetit, pas informacioneve të pranuara nga autoritetet e Malit të Zi lidhur me dërgesat e mishit me origjinë nga Brazili. Sipas të dhënave, autoritetet doganore malazeze kanë ndaluar gjithsej rreth 103 tonë mish, të cilat dyshohet se kishin për destinacion tregun kosovar.
AUV-i ka bërë me dije se që nga data 18 shtator ka iniciuar kontrolle të detajuara dhe mbikëqyrje të vazhdueshme të këtij biznesi. Ekipet inspektuese po verifikojnë dokumentacionin e importit, afatet e përdorimit, sasitë e shpërndara, si dhe destinacionet e produkteve që tashmë janë vendosur në treg. Procesi i kontrollit është shoqëruar edhe me marrjen e mostrave për analiza laboratorike.
Në nivel kufitar, AUV-i ka vendosur masa shtesë në bashkëpunim me autoritetet e Menaxhimit të Integruar të Kufirit (MIK). Këto masa synojnë verifikimin e plotë të ngarkesave përpara se ato të hyjnë në territorin e Kosovës. Agjencia ka deklaruar se, në varësi të gjetjeve dhe vlerësimit të nivelit të rrezikut, do të ndërmarrë masa ekzekutive, përfshirë ndalimin e qarkullimit dhe tërheqjen nga tregu të çdo produkti që nuk plotëson kriteret ligjore të sigurisë ushqimore.
Institucioni ka njoftuar se do të mbajë të informuar publikun për çdo të gjetur të re. Në rast të identifikimit të ndonjë produkti që paraqet rrezik për shëndetin publik, AUV-i do të publikojë të dhënat identifikuese dhe udhëzimet përkatëse për konsumatorët.