Në hyrje të qytetit të Shkodrës po merr formë Muzeu Kombëtar i Lundrimit, një vepër arkitekturore që synon të pasqyrojë lidhjen historike të qytetit me liqenin, lumenjtë dhe traditën e lundrimit. Kryeministri i Shqipërisë, Edi Rama, ndau në rrjetet sociale pamje nga punimet, duke theksuar se ky muze do të jetë një destinacion i ri kulturor për vizitorët.
Sipas projektit, struktura e muzeut do të përbëhet nga dy volume të vendosura mbi njëri-tjetrin: një volum në formë kodre në pjesën e poshtme dhe një "varkë pluskuese" në pjesën e sipërme. Brenda godinës parashikohen hapësira të larmishme, duke përfshirë një ekspozitë të përhershme, një kënd për fëmijë, një laborator për rikrijimin e varkave dhe një dhomë edukative. Financimi për këtë infrastrukturë është siguruar nga Bashkimi Evropian me një fond prej 2,4 milionë euro, ndërsa zbatimi mbështetet nga Banka Europiane për Rindërtim dhe Zhvillim.