Ndërtimi i Muzeut të Lundrimit po avancon në hyrje të qytetit të Shkodrës, si pjesë e një pakete ndërhyrjesh që synojnë rritjen e potencialit turistik të qytetit. Kryeministri Edi Rama ndau pamje të projektit në rrjetet sociale, duke e vlerësuar atë si një hapësirë të rëndësishme kushtuar historisë dhe trashëgimisë së lundrimit.
Arkitektura e objektit karakterizohet nga dy volume të vendosura njëri mbi tjetrin: një volum i poshtëm në formë kodre dhe një pjesë e sipërme që imiton një “varkë pluskuese”. Brenda këtij muzeu, vizitorët do të gjejnë:
• Ekspozitë të përhershme
• Kënd për fëmijë
• Laborator për rikrijimin e varkave
• Dhomë edukative
Ky investim me vlerë 2,4 milionë euro realizohet me financim të Bashkimit Evropian, përmes Bankës Evropiane për Rindërtim dhe Zhvillim (BERZH). Projekti synon promovimin e vlerave kulturore në një prej qyteteve me traditën më të pasur të lundrimit në Shqipëri.
Përditësime
Ndërtimi i Muzeut të Lundrimit në hyrje të Shkodrës, pranë lumit Buna, po i afrohet fazës finale. Autoritetet konfirmojnë se punimet do të përfundojnë brenda shkurtit të vitit 2026.