Kryeministri Edi Rama gjatë një takimi me kryetarët e bashkive u kërkoi atyre të identifikojnë shtëpitë e vjetra me vlera për trashëgiminë kulturore, të cilat janë të pabanuara ose në rrënim e sipër. Kjo ndodhi dje në mbledhjen me kryebashkiakët.
Ai theksoi se Ministria e Turizmit, Kulturës dhe Sportit ka nisur një proces për muzealizimin e këtyre godinave historike. Synimi është marrja e tyre nga shteti përmes shpronësimit ligjor dhe kthimi në hapësira muzeale, veçanërisht në qytete dhe fshatra të vjetra.
Në Tiranë tashmë ka disa shtëpi të tilla në proces, si dhe raste jashtë saj, sipas listës së ministrisë. Rama u kërkoi kryebashkiakëve të angazhohen, të përcaktojnë kandidaturat, t’i ndajnë me Ministrinë e Turizmit, Kulturës dhe Sportit dhe Institutin e Monumenteve të Kulturës, për të klasifikuar vlerat dhe për të planifikuar përdorimin e tyre.
Ide për atraksione të reja
Kryeministri Rama nënvizoi potencialin turistik të Shqipërisë në çdo cep të territorit. Ai sugjeroi krijimin e muzeumeve të vogla për produkte tradicionale si raki, verë ose vaj ulliri, për të rritur ofertën dhe për të promovuar trashëgiminë. Bashkitë duhet të ndërtojnë një plan muzealizimi të shtëpive të vjetra bashkë me njerëz të ditur vendorë.