Një avari në kanalin e furnizimit që ushqen katër degët kryesore të ujitjes nga Rezervuari i Thanës ka shkaktuar probleme me furnizimin me ujë për zonat bujqësore të Lushnjës, Divjakës dhe Fierit.
Lajmin e bëri të ditur ministri i Bujqësisë dhe Zhvillimit Rural, Andis Salla, i cili njoftoi se ekipet teknike ndodhen në terren dhe po punojnë pa ndërprerje për eliminimin e defektit. Sipas ministrit, po bëhen përpjekje për rikthimin e sistemit në funksionim normal sa më shpejt të jetë e mundur.
Në reagimin e tij publik, Salla u kërkoi mirëkuptim banorëve dhe fermerëve për këtë situatë të papritur, duke garantuar se strukturat përgjegjëse janë angazhuar për zgjidhjen e problemit në kohën më të shkurtër.