Në Dhomat e Specializuara të Kosovës në Hagë ka nisur paraqitja e fjalëve përmbyllëse në gjyqin ndaj ish-presidentit Hashim Thaçi, ish-kryeparlamentarit Kadri Veseli, Jakup Krasniqi dhe ish-deputetit Rexhep Selimi.
Avokati i Jakup Krasniqi, Aiden Ellis, e ka nisur fjalën duke thënë se prokuroria nuk e ka vërtetuar ekzistencën e një lidhjeje shkakësore midis veprimeve të klientit të tij dhe akuzave në aktakuzë. Ai kritikoi prokurorinë për shpalosjen e argumenteve të reja gjatë deklaratave përmbyllëse, ndërkohë që procesi po afrohet drejt fundit.
Ellis deklaroi: "Duke mos u treguar deklaratat dëshmitarëve që lidhen me këto dëshmi, prokuroria nuk ka të drejtë të dalë me përfundimin se deklaratat janë shpërndarë në mënyrë të gjerë, janë lexuar, se janë marrë masa në bazë të tyre apo që kanë kontribuuar në mënyrë të konsiderueshme në kryerjen e krimeve".
Sipas burimeve, kjo është seanca e gjashtë e deklaratave përmbyllëse. Jashtë gjykatës është shfaqur interesim i madh, me praninë e dy vëllezërve të Hashim Thaçi dhe qytetarëve të tjerë që qëndrojnë pranë objektit që në orët e hershme të së hënës, 16 shkurt 2026.
Ish-krerët e UÇK-së pritet t’i drejtohen trupit gjykues nga dita e mërkurë, për herë të fundit në këtë proces.