Avokati i Popullit, Naim Qelaj, ka deklaruar se kriza e zgjatur politike në Kosovë po cenon drejtpërdrejt të drejtat e qytetarëve. Sipas tij, për të dytin vit radhazi, vendi po funksionon pa institucione të plota, si pasojë e zgjedhjeve të përsëritura.
Në një prononcim për mediat, Qelaj shpjegoi se mungesa e institucioneve të plota po pengon nismat legjislative, miratimin e ligjeve të reja dhe ndryshimin e atyre ekzistuese, të cilat ndikojnë drejtpërdrejt në mirëqenien e qytetarëve. Ai shtoi se institucionet publike, në mungesë të autoriteteve mbikëqyrëse, po shfaqin dinamikë të ulët në punën e përditshme dhe në realizimin e projekteve.
Sipas Avokatit të Popullit, një numër i institucioneve, përfshirë atë që ai drejton, janë duke funksionuar me mandate të vazhduara, fakt që pengon funksionimin e duhur demokratik. Qelaj theksoi se qytetarët po përballen me një situatë pasigurie dhe paparashikueshmërie.
"Unë konsideroj se rezultati i zgjedhjeve të fundit do të finalizohet me krijim të institucioneve dhe nuk do të vazhdohet me kriza të tjera politike", u shpreh Qelaj, duke paralajmëruar se çdo zgjatje e krizës do të thellonte dëmet për vendin.