Eugen Cakolli, hulumtues në KDI, ka deklaruar se zgjedhjet përbëjnë opsionin më të keq në fazën aktuale kushtetuese. Ai u shpreh për Ekonomia Online se Gjykata Kushtetuese duhet të veprojë shpejt, duke shqyrtuar vendosjen e një mase të përkohshme lidhur me dekretin e presidentes, për të shmangur një krizë më të thellë institucionale.
Sipas Cakollit, ndonëse sipas parimit të ligjshmërisë dekretet konsiderohen të vlefshme derisa gjykata të vërtetojë të kundërtën, paqartësitë kushtetuese kërkojnë reagim të menjëhershëm. “Edhe pse sipas parimit të ligjshmërisë dekretet janë të ligjshme derisa të vërtetohet e kundërta në gjykatë, për shkak të paqartësisë kushtetuese që kemi në këtë situatë është tejet e rëndësishme që gjykata ta trajtojë me prioritet lëndën dhe potencialisht të vendosë edhe masë të përkohshme mbi bazë ex officio, nëse një kërkesë e tillë nuk është paraqitur nga Lëvizja Vetëvendosje”, ka thënë ai.
Cakolli paralajmëron se mungesa e këtyre hapave mund të çojë në një cikël të kontestuar institucional. Ai kujton rastin e zgjedhjes së nënkryetarëve, kur Gjykata Kushtetuese konstatoi se procedura nuk kishte qenë kushtetuese, por Kuvendi ishte shpërndarë dhe vendi shkoi në zgjedhje pas një procedure jokushtetuese në esencë.
Praktika e deritanishme tregon se Gjykata Kushtetuese ka trajtuar me prioritet raste të ndjeshme dhe ka vendosur masa të përkohshme pa kërkesë nga palët. Ai pret që brenda kësaj jave, nëse jo brenda ditëve aktuale, të vendoset masë të përkohshme si mënyra e vetme për të parandaluar shkelje më të rënda dhe cenim të interesit publik.