Pas zbardhjes së vendimit të Gjykatës Kushtetuese, e cila ka ngarkuar Gjykatën e Lartë me detyra specifike, mbrojtja ligjore e kryetarit të Bashkisë së Tiranës, Erion Veliaj, i është drejtuar kësaj të fundit me një kërkesë zyrtare për përshpejtimin e procesit gjyqësor.
Avokati Plarent Ndreca argumenton se çdo vonesë në rigjykim sjell pasoja të drejtpërdrejta, jo vetëm për lirinë personale të Veliajt, por edhe për ushtrimin e mandatit të tij. Sipas mbrojtjes, elementi kohor është thelbësor për mbarëvajtjen e funksionit publik. Në dokument nënvizohet se, nëse çështja nuk shqyrtohet me përparësi, rigjykimi rrezikon të humbasë efektivitetin e tij praktik, duke e bërë çdo vendim të mëvonshëm vetëm deklarativ.
Kërkesat e mbrojtjes
Krahas kërkesës për shpejtësi, mbrojtja i kërkon Gjykatës së Lartë të vlerësojë:
- Nëse masa e sigurisë arrest në burg vijon të jetë e domosdoshme dhe proporcionale.
- Nëse janë shqyrtuar realisht masat alternative të sigurimit.
- Nëse mbajtja e Erion Veliajt në kafazin prej xhami gjatë seancave cenon dinjitetin njerëzor, prezumimin e pafajësisë dhe të drejtën për një mbrojtje efektive.
Sipas mbrojtjes, pretendimi mbi kafazin e xhamit kërkon një vlerësim juridik dhe kushtetues, pa qenë nevoja për rivlerësim të provave apo fakteve të tjera.