Granit Syla, avokati i të dyshuarit B. Demiri, ka deklaruar se klienti i tij nuk e pranon veprën penale për të cilën dyshohet në lidhje me vdekjen e djalit dhe mbesës së tij. Të dy u gjetën pa shenja jete më 1 nëntor, në fshatin Demiraj të Gjilanit. Hetimet po zhvillohen nën dyshimin për vrasje të rëndë.
Syla tha se mori pjesë në seancën dëgjimore për caktimin e masës së paraburgimit, pas kërkesës së Prokurorisë Themelore në Gjilan. Sipas avokatit, Demiri është deklaruar se nuk është kryerësi i veprës penale për të cilën dyshohet.
Në kohën kur avokati dha deklaratën, mbrojtja ende nuk e kishte marrë vendimin e gjykatës për kërkesën e paraburgimit. Syla tha se, pasi ta marrë vendimin, mbrojtja do ta shqyrtojë atë dhe do të përcaktojë hapat e mëtejshëm proceduralë, në përputhje me Kodin e Procedurës Penale.
Avokati nuk dha hollësi të tjera për rastin. Ai tha se çështja është në fazën e hetimeve dhe se deklarimet e mëtejshme do të varen nga rrjedha e procedurës. Burimet e identifikojnë të ndjerin si një 27-vjeçar dhe vajzën e tij si tre muajshe.