Në seancën plenare të Kuvendit, Taulant Balla, kryetari i Grupit Parlamentar të Partisë Socialiste, mbrojti aktivitetin e portit të kompanisë MBM në Porto Romano. Ai kundërshtoi kritikat e opozitës për mungesë kapacitetesh dhe problematika në sektorin portual.
Gjatë debatit, Balla kritikoi tonet e opozitës duke i krahasuar me diskursin e viteve të "luftës së klasave". "Vjen këtu dhe na flet si dikur në këtë sallë. Flisnin për luftën e klasave, jo ik ti, jo i atij", u shpreh ai duke iu drejtuar deputetit Redi Muçi të Lëvizjes Bashkë.
Balla theksoi se sulmet ndaj biznesit janë të pajustifikuara, pasi kompanitë kontribuojnë në financat publike përmes taksave. "Përmendim këtu emra biznesmenësh të cilët paguajnë taksat… me një pjesë të taksave të tyre paguhet edhe paga jote", deklaroi ai.
Sa i përket portit MBM në Porto Romano, Balla deklaroi se ai ka ende kapacitete të pashfrytëzuara. "Ai port sot ka vetëm 20% të kapacitetit të vet të zënë dhe ka hapësirë", u shpreh ai. Ai hodhi poshtë shqetësimet e opozitës për mungesë kapacitetesh duke garantuar se qeveria ka planifikuar si duhet sektorin.
"Kjo qeveri ka planifikuar si duhet kapacitetet tona përpunuese në sektorin e transportit detar", theksoi Balla. Në përfundim, ai e cilësoi portin si shembull të planifikimit të qeverisë dhe një prej atyre me aftësitë punuese më të mëdha në Detin Adriatik.