Një zjarr ka rënë pasditen e së mërkurës në një objekt banimi të ndodhur në rrugën e Spitalit në Pogradec, përballë Poliklinikës së qytetit. Ngjarja shkaktoi panik te banorët e zonës, por situata u menaxhua shpejt nga forcat e Mbrojtjes nga Zjarri dhe Shpëtimi (MZSH), të cilat mbërritën menjëherë në vendngjarje.
Sipas informacioneve paraprake, flakët janë izoluar plotësisht dhe nuk përbëjnë më rrezik për banesat fqinje. Megjithëse nuk ka pasur lëndime në njerëz, raportohet se dëmet materiale në banesën e prekur janë të konsiderueshme. Burime nga vendngjarja bëjnë me dije se në këtë objekt banon një familje në vështirësi ekonomike.
Aktualisht, ekipet e zjarrfikësve po vijojnë punën në terren për shuarjen përfundimtare të çdo vatre të mbetur. Ndërkohë, autoritetet kanë nisur hetimet për të përcaktuar shkaqet dhe rrethanat që çuan në rënien e zjarrit.