Në raportin e publikuar më 21 tetor 2026, Banka Botërore e vlerësoi si mesatarisht të pakënaqshme ecurinë e projektit për qëndrueshmërinë ndaj ndryshimeve klimatike dhe zhvillimin e bujqësisë në Shqipëri. Nga financimi i rishikuar prej 72,4 milionë dollarësh, janë disbursuar 6,51 milionë dollarë, ose rreth 9 për qind, ndërsa 65,89 milionë dollarë mbeten të padisbursuara. Vlerësimi për progresin drejt objektivave të zhvillimit dhe zbatimin e përgjithshëm nuk ka ndryshuar nga raporti i mëparshëm.
Projekti u miratua në mars 2023 dhe hyri në fuqi në shkurt 2024. Institucion zbatues është Ministria e Bujqësisë dhe Zhvillimit Rural. Synimet përfshijnë përmirësimin e konkurrueshmërisë së prodhimit bujqësor, modernizimin e ujitjes dhe kullimit, forcimin e sigurisë ushqimore dhe përshtatjen e sektorit ndaj ndryshimeve klimatike. Afati i përfundimit është shtatori 2028.
Sipas raportit, vonesat fillestare lidhen me nisjen e ngadaltë të prokurimeve, kapacitetet e kufizuara institucionale, aktivitetet përgatitore dhe finalizimin e kontratave. Zbatimi mbetet pas afateve në disa fusha kritike, thuhet në raport, ku theksohet nevoja për përshpejtimin e aktiviteteve prioritare dhe kthimin e angazhimeve në rezultate konkrete. Kapacitetet institucionale për zbatimin dhe qëndrueshmërinë e projektit vlerësohen me rrezik të lartë, nga rrezik i ulët në kohën e miratimit. Rreziku fiduciar, që lidhet me administrimin e fondeve dhe prokurimet, është rritur nga mesatar në të konsiderueshëm, ndërsa rreziku i përgjithshëm mbetet mesatar.
Treguesit e projektit mbeten prapa objektivave
Shitjet e produkteve bujqësore përmes qendrave Micro Food Hubs janë zero, kundrejt objektivit prej 6 000 tonësh. Qendrat nuk janë krijuar ende dhe asnjë fermer nuk ka përfituar nga aktivitetet e tyre apo nga grupimet prodhuese të financuara nga projekti.
Edhe sipërfaqja që ka përfituar shërbime të përmirësuara të ujitjes dhe kullimit është zero, kundrejt synimit prej 12 300 hektarësh. Nuk është regjistruar përparim në objektivin për uljen me 30 për qind të kostove të ujitjes apo në përdorimin e energjisë së rinovueshme në këto sisteme.
Në fushën e sigurisë ushqimore, asnjë nga gjashtë pikat e planifikuara të inspektimit kufitar nuk është përfunduar. Në zero mbeten gjithashtu analizat e reja në laboratorët rajonalë, trajnimi i 75 punonjësve laboratorikë dhe shtimi i kapaciteteve të magazinimit për produktet e bllokuara. Nuk ka përparim të regjistruar as në akreditimin e metodave të analizës në Laboratorin Kombëtar të Referencës.
Raporti përmend vonesa në krijimin e platformës së analizës së të dhënave për ministrinë dhe bashkitë, si dhe në vënien në funksion të plotë të mekanizmave për marrjen e vlerësimeve nga përfituesit dhe trajtimin e ankesave.
Megjithatë, Banka Botërore raporton për përmirësim të ritmit të zbatimit, duke përmendur nisjen e punimeve në skemën e ujitjes së Mursisë dhe përparimin në modernizimin e sistemeve të ujitjes dhe laboratorëve. Ministria dhe Banka Botërore kanë rënë dakord të forcojnë mbikëqyrjen, bashkërendimin institucional, prokurimet dhe monitorimin e rezultateve. Raporti lë të hapur mundësinë e ndryshimeve në objektin dhe mënyrën e zbatimit të projektit.