Ditën e sotme, paralelisht me seancën e Kuvendit, banorët e Durrësit të prekur nga projekti TID dhe banorët e Rrjollit në Shkodër zhvillojnë një protestë para Parlamentit.
Protestuesit shprehën pakënaqësinë ndaj këtyre projekteve, duke i cilësuar ato të padrejta dhe në dëm të komunitetit. Ata akuzojnë deputeten Belinda Balluku dhe kryeministrin Edi Rama se po u vjedhin pronat. Gjithashtu, kritikuan deputetët socialistë se ngrejnë kartonat pa të drejtë për të miratuar vendime të tilla.
Një banore u shpreh: “Me këtë që po bën ky hajduti, bashkë me Belinda Ballukun (kriminele), vetëm një gjë të dijë, do t’i vijë dita të ikë i pari, i dyti dhe të ikë vetë bashkë me ata bastardë parlamentarë socialistë që rrinë atje dhe ngrenë kartonin me të padrejtë”.
Protestës iu bashkua kryetari i Partisë “Mundësia”, Agron Shehaj, si dhe Redi Muçi.
Sa i përket Rrjollit, kjo është e 10-ta ditë radhazi e protestave. Banorët u kanë bërë thirrje ndërtuesit të ndalojë punimet për resortin turistik dhe të ulet në bisedime për një marrëveshje. Pak javë më parë, ata kanë depozituar një kallëzim në SPAK. Leja e ndërtimit për resortin është lëshuar me firmën e Belinda Ballukut, çka ka shkaktuar përplasje mes pronarëve të tokave dhe ndërtuesit.