Banorët e Rrjollit, që kundërshtojnë ndërtimin e një resorti, dhe banorët e Durrësit, të prekur nga projekti TID, zhvilluan protestë para Prokurorisë së Posaçme Kundër Korrupsionit dhe Krimit të Organizuar (SPAK) më 11 mars 2026.
Protestuesit kërkuan takim me zyrtarë të SPAK-ut për të trajtuar pretendimet e tyre. Një qytetar deklaroi se "janë të njëjtët persona që duan të vjedhin pronat e qytetarëve", duke iu referuar atyre që synojnë të ndërtojnë në tokat e tyre.
Në shenjë pakënaqësie, ata hodhën vezë drejt godinës së SPAK-ut. Një banor u shpreh se "protestat nuk do të ndalen, qytetarët do të jenë aty".
Një protestues tjetër tha: "Unë nuk pranoj marrëveshje me atë person që kërkon të imponohet me forcë. Ne duam të zbardhet e vërteta. Nga prokuroria e rrethit Shkodër nuk kemi besim, sepse prej një viti nuk kemi marrë asnjë përgjigje".
Banorët kërkojnë ndërprerjen e ndërtimeve dhe zgjidhjen e situatës në përputhje me ligjin. Ata apelojnë për ndërhyrje nga institucionet shtetërore dhe SPAK-u.