Banorë të fshatrave të Njësisë Administrative Thumanë zhvilluan më 11 shkurt 2026 një protestë në rrugën e fshatit Gramzë, duke bllokuar për rreth një orë segmentin që lidh me aksin e autostradës Thumanë–Kashar.
Sipas protestuesve, një pjesë rreth 500 metra e kësaj rruge është në gjendje të amortizuar dhe paraqet problem për drejtuesit e automjeteve për shkak të dëmtimeve në asfalt dhe mungesës së ndërhyrjeve. Ata theksojnë se kjo situatë ka zgjatur gati një vit dhe ndikon në lëvizjen e përditshme.
Protestuesit shprehen të pakënaqur ndaj institucioneve përgjegjëse dhe paralajmërojnë se do të vazhdojnë bllokimet deri në rikonstruksionin e plotë të segmentit. Rruga shërben për qarkullimin e banorëve të tre fshatrave me rreth 3 mijë banorë, si dhe për trafikun nga veriu i vendit.
Në mbështetje të tyre ishte aktivisti i shoqërisë civile Aulon Kalaja, i cili kërkoi reagim të menjëhershëm nga autoritetet. Kalaja deklaroi se banorët vuajnë prej balte dhe gropash, se autoritetet kanë hedhur çakull pas njoftimit të protestës dhe se nevojitet asfalt rreth 25 cm të trashë, jo asfalt që shpërbëhet me shi.
Banorët thanë se rruga është bërë e vështirë për automjetet dhe kërkojnë ndërhyrje emergjente për sigurinë. Njëri prej tyre u shpreh se "këtu kalon gjithë veriu dhe nuk vjen shteti fare", ndërsa një tjetër theksoi nevojën për rrugë të përshtatshme për hyrjen në Europë.