Në prag të një proteste kundër ndërtimit të një resorti në Zvërnec, banori Minella Balliu ka bërë publike pretendimet e tij mbi pronësinë e tokës ku pritet të zhvillohet investimi. Sipas Balliut, prona është blerë nga gjyshi i tij në vitin 1932, fakt që ai thotë se provohet nga dokumentacioni i kohës dhe transkriptet përkatëse.
Balliu sqaroi se kjo sipërfaqe prej 220 hektarësh iu sekuestrua nga shteti komunist në vitin 1946, ndërsa pas viteve '90, e drejta e pronësisë iu njoh nga Gjykata e Vlorës. Megjithatë, ai akuzon Artur Shehun se e ka përvetësuar këtë pronë përmes dokumenteve të falsifikuara. Sipas banorit, ky proces është mbështetur fillimisht nga ish-kreu i Gjykatës së Apelit të Tiranës, Alaudin Malaj, në vitin 2009.
Çështja ka pasur zhvillime të mëvonshme ligjore, pasi Gjykata e Lartë e ka hedhur poshtë vendimin e Alaudin Malajt, duke urdhëruar rinisjen e gjykimit nga e para në Gjykatën e Vlorës. Banori ka bërë të ditur se e ka ngritur këtë shqetësim edhe gjatë një diskutimi me Kryeministrin, duke kërkuar pezullimin e çdo veprimi deri në përfundim të procesit gjyqësor.
Pavarësisht pretendimeve për pronën, Minella Balliu shprehu mbështetje ndaj investimeve në këtë zonë bregdetare, duke theksuar se ndërtimi do të shërbente për zhvillimin e rajonit.