Barkodi në Kalanë e Libohovës çon në faqe pornografike

Një rast i pazakontë është regjistruar në Kalanë e Libohovës, ku një barkod (QR Code) i vendosur në tabelën informuese të monumentit, në vend të informacionit historik, i drejtonte vizitorët drejt faqeve me përmbajtje pornografike. Pas denoncimeve të turistëve, Bashkia e Libohovës ndërhyri menjëherë duke hequr barkodin dhe duke nisur procesin e verifikimit. Drejtori i Kulturës Kombëtare në Gjirokastër, Ardis Duka, sqaroi se barkodi ishte instaluar rreth 6 vite më parë në kuadër të një projekti të realizuar nga një organizatë jofitimprurëse, kur ishte krijuar edhe një faqe interneti dedikuar kalasë. Sipas Dukës, faqja ka mbetur pa mirëmbajtje dhe dyshohet se është hakeruar. Institucionet do të shqyrtojnë kontratën e projektit për të përcaktuar përgjegjësitë mbi mirëmbajtjen e faqes. Në lidhje me këtë ngjarje, autoritetet po shqyrtojnë mundësinë që problemi të ketë ardhur si pasojë e hakerimit ose nga skadimi i domenit të përdorur nga kompania e huaj që kishte instaluar kodet në atë kohë. Si masë parandaluese, është kërkuar kontrolli i të gjitha barkodeve të vendosura në sitet turistike të rajonit, si dhe krijimi i një aksesi të ri për informacionin e monumenteve.