Ministri në detyrë i Infrastrukturës dhe Transportit, Dimal Basha, ka kërkuar angazhim më të madh të partnerëve ndërkombëtarë për zhvillimin e projekteve strategjike infrastrukturore të Kosovës. Gjatë pjesëmarrjes në Samitin e Investimeve në Transport në Selanik të Greqisë, ai theksoi se sektori hekurudhor është thelbësor për zhvillimin ekonomik, lidhshmërinë rajonale dhe interesat strategjike të Evropës.
Në panelin e nivelit të lartë, Basha diskutoi së bashku me ministra të vendeve të Ballkanit Perëndimor dhe zyrtarë të lartë, përfshirë:
- Apostolos Tzitzikostas, Komisioner Evropian për Transportin
- Christos Dimas, ministër i Infrastrukturës dhe Transportit i Greqisë
- Mark Bowman, zëvendëspresident i BERZH-it
- Robert de Groot, përfaqësues i BEI-së
Diskutimi u përqendrua në nevojën për përshpejtimin e përgatitjes së projekteve dhe mobilizimin e fondeve publike dhe private. Zëvendëspresidenti i BERZH-it, Mark Bowman, vlerësoi se sfida kryesore mbetet zbatimi i këtyre nismave, duke kërkuar forcimin e institucioneve për të kthyer korridoret strategjike në investime të prekshme. Nga ana tjetër, përfaqësuesit e BEI-së theksuan se lidhshmëria efektive mbetet një element kyç për zhvillimin e rrjeteve evropiane të transportit.