Bashkia e Tiranës ka nisur një aksion në të gjithë territorin e qytetit për të kontrolluar mbi 60 subjekte për respektimin e hapësirave publike. Aksioni synon lirimin e zonave të zëna nga bizneset që kanë abuzuar me to. Nënkryetari Blendi Sulaj ka ndjekur vijimin e këtij aksioni gjatë ditës së 31 marsit 2026.
Para nisjes së aksionit, Blendi Sulaj u shpreh se disa sheshe në Tiranë janë zënë plotësisht. Ai vlerësoi punën e Policisë Bashkiake në evidentimin dhe ndërhyrjen për t’i rikthyer këto zona në shërbim të qytetarëve. “Ne do të nisim një aksion në të gjithë territorin e qytetit të Tiranës me objektivin kryesor për të liruar ato hapësira publike ndaj atyre bizneseve apo subjekteve të cilat kanë abuzuar me këto hapësira. Kemi listuar rreth 60 subjekte të cilat me përkushtimin tuaj sot këto hapësira publike të cilat u janë zënë qytetarëve do t’i kthehen prapë këtyre qytetarëve të qytetit të Tiranës. Do të doja shumë nga ana juaj vetëm për korrektësi, sjellje të mirë me qytetarët, sjellje të mirëkuptueshme me biznesin, por zbatim rigoroz të ligjit dhe lirim të hapësirës publike me çdo kusht”, tha Sulaj.
Drejtoresha e Policisë Bashkiake të Tiranës, Elona Lalaj, theksoi mungesën e tolerancës për bizneset që zënë hapësirat publike. Ajo u kërkoi punonjësve zbatim rigoroz të ligjit. “Sot nuk ka më tolerim për asnjë biznes, qoftë për tejkalimin për të cilat ata bëjnë, qoftë edhe për reduktimin, për të cilat ne kemi rakorduar me Drejtorinë Vendore të Taksave për sa i përket këtyre hapësirave. Kështu që nga gjithsecili prej jush dua korrektësi, dua zbatim rigoroz të ligjit, koha është tani, dua që këto hapësira t’i kalojmë në funksion të qytetarit”, deklaroi Lalaj.