Bashkim Jashari, komandant i Forcës së Sigurisë së Kosovës (FSK), vizitoi bazën e aviacionit të Gardës Kombëtare të Ajovës në Shtetet e Bashkuara, në margjinat e një vizite zyrtare në këtë shtet.
Baza vlerësohet si një nga njësitë kryesore të Gardës. Gjatë vizitës, gjenerali Jashari u njoh nga afër me aftësitë dhe kapacitetet e saj, duke përfshirë helikopterët e modelit Black Hawk.
Stafi i bazës e njoftoi KOMFSK-në dhe delegacionin e tij për procedurat e trajnimit të personelit të aviacionit, mirëmbajtjen e helikopterëve, infrastrukturën përcjellëse dhe inspektimet e nevojshme.
Gjenerali Bashkim Jashari dhe gjenerali Stephen Osborn u pajtuan për krijimin e grupeve punuese të përbashkëta. Këto grupe do të planifikojnë ngritjen e këtij kapaciteti në kuadër të FSK-së, duke mbuluar trajnimin, operimin, mirëmbajtjen dhe infrastrukturën adekuate.
Në përfundim të vizitës, Jashari vlerësoi lartë profesionalizmin e njësia dhe falënderoi stafin për gatishmërinë për të ofruar mbështetje FSK-së. Ai e cilësoi kapacitetin me helikopterë Black Hawk si shumë të nevojshëm për FSK-në në të ardhmen.