Në një analizë, media britanike BBC shpjegon pse udhëheqësit evropianë e kanë të vështirë të flasin me një zë të vetëm për Iranin dhe zhvillimet në Lindjen e Mesme. Për javë të tëra, udhëheqësit dhe politikëbërësit evropianë vëzhguan përforcimin e ushtrisë amerikane në rajon dhe dëgjuan kërcënimet e administratës Trump ndaj Teheranit: hiqni dorë nga aspiratat bërthamore, përndryshe.
Që kur sulmi amerikano-izraelit ndaj Iranit filloi tre ditë më parë, Evropa ka dukur pakoordinuar, i përçarë dhe pa ndikim. Çdo vend evropian është i shqetësuar për qytetarët e tij në rajon dhe mundësinë e evakuimit të dhjetëra mijëra njerëzve. Qeveritë evropiane shqetësohen po ashtu për ndikimin ekonomik të krizës te konsumatorët, sidomos te çmimet e energjisë dhe ushqimeve. Çmimet e gazit evropian janë rritur në një masë të paparë që nga fillimi i pushtimit të plotë të Ukrainës nga Rusia në vitin 2022.
Në planin politik, Evropa përpiqet të gjejë një qëndrim të bashkuar për zhvillimet e shpejta në Lindjen e Mesme. Franca, Gjermania dhe Mbretëria e Bashkuar arritën të lëshojnë një deklaratë të përbashkët gjatë fundjavës, duke paralajmëruar Iranin se janë gati të ndërmarrin veprime mbrojtëse për të shkatërruar aftësinë e tij për të lëshuar raketa dhe dronë, nëse Teherani nuk ndalon sulmet pa dallim.
Që atëherë, Mbretëria e Bashkuar ka rënë dakord me një kërkesë të SHBA-së për të përdorur dy baza ushtarake britanike për sulme mbrojtëse ndaj objekteve raketore iraniane, pavarësisht kritikave të presidentit Trump për mungesën e angazhimit më të madh britanik. Franca po forcon praninë e saj në Lindjen e Mesme pas një sulmi iranian që goditi një bazë franceze në Emiratet e Bashkuara Arabe. Gjermania vazhdon të shqyrtojë pozicionin e saj në këtë krizë.