Bedri Hamza, kryetari i Partisë Demokratike të Kosovës (PDK), së bashku me deputetët e kësaj partie, kanë zhvilluar homazhe përkujtimore në Kuvendin e Kosovës në nderim të jetës dhe veprës së akademikut Rexhep Qosja.
Hamza ka shkruar ngushëllimet në Librin e Zisë. Homazhet do të vazhdojnë deri në orën 16:00 të 24 prillit, e cila është shpallur ditë zie në Kosovë.
Akademiku, shkrimtari dhe kritiku letrar shqiptar Rexhep Qosja ka vdekur të enjten në moshën 90-vjeçare, ka njoftuar familja e tij. Nipi i tij, Valjet Rexhepi, ka bërë të ditur përmes një postimi në Facebook se Qosja është varrosur të enjten në një ceremoni private familjare.
Rexhepi ka theksuar: "Me dëshirë të të ndjerit, nuk do të organizohet ceremoni pritjeje nga familja. Familja nuk do të marrë pjesë në organizime institucionale. Lusim që privatësia jonë të respektohet dhe të na mundësohet të mbajmë zi në qetësi!".