Kandidati për kryeministër nga radhët e Partisë Demokratike të Kosovës (PDK), Bedri Hamza, ka zhvilluar një tubim elektoral në Drenicë, ku ka vënë theksin te rëndësia historike e kësaj treve në rrugëtimin e Kosovës. Gjatë fjalimit të tij, Hamza e cilësoi Drenicën si një vend të qëndresës, mikpritjes dhe bujarisë, duke shtuar se ajo ka luajtur rol kyç në kthesat e mëdha historike të vendit.
Duke iu drejtuar qytetarëve, Hamza deklaroi se ashtu siç i është thënë "stop padrejtësive" në të shkuarën, sot duhet t'i thuhet "stop krizës" përmes ndryshimit në zgjedhjet e 7 qershorit. Ai theksoi se historia e Drenicës dhe dinjiteti i saj nuk mund të ndryshohen nga askush, duke përforcuar mesazhin se vendi ka nevojë për një kthesë politike.
Tubimi në Drenicë është pjesë e fushatës së PDK-së, e cila po zhvillohet me sloganin "Stop Krizës. Ndrysho Kosovën!". Hamza kërkoi mbështetjen e qytetarëve për të udhëhequr ndryshimin në nivel qendror, duke bërë thirrje për bashkëpunim dhe unitet.