Kryetari i Partisë Demokratike të Kosovës dhe kandidati për Kryeministër, Bedri Hamza, ka vazhduar takimet me qytetarët në kuadër të fushatës zgjedhore. Kësaj radhe ai u prit nga familja Thaçi në Mitrovicë.
Hamza ka theksuar se qëllimi i këtyre takimeve është dëgjimi i drejtpërdrejtë i nevojave dhe shqetësimeve të qytetarëve. Ai ka vlerësuar se Kosova po përballet me një krizë të thellë ekonomike dhe sociale gjatë viteve të fundit, të shkaktuar nga vendime të gabuara politike.
Kryefamiljari Besim Thaçi, profesor i teknologjisë, ka vënë në dukje se çmimet janë rritur vazhdimisht, ndërsa pagat kanë mbetur pothuajse të njëjta që nga periudha kur ato u rritën nga Hamza në cilësinë e ish-ministrit të Financave.
Hamza ka deklaruar se është e nevojshme t’i jepet Kosovës një drejtim i ri politik dhe ekonomik. Ai ka propozuar rritje pagash e pensionesh, ulje tatimesh dhe investime të mëdha në ekonomi, shëndetësi e arsim.