Partia Demokratike e Kosovës ka prezantuar sloganin zyrtar të fushatës për zgjedhjet e parakohshme të 7 qershorit: “Stop Krizës. Ndrysho Kosovën!”.
Kryetari i PDK-së, Bedri Hamza, ka publikuar videon në rrjetet sociale. Në të shfaqen 16 persona të profesioneve dhe grupmoshave të ndryshme që thonë fjalën “STOP”. Hamza ka deklaruar se slogani paraqet një thirrje për ndryshim dhe për t’i dhënë fund krizave me të cilat po përballen qytetarët.
“STOP krizave politike. STOP çmimeve të larta. STOP pasigurisë, përçarjes dhe mungesës së shpresës”, thuhet në mesazhin e publikuar. Sipas Hamzës, Kosova ka nevojë për stabilitet, siguri dhe një qeveri që merret me mirëqenien e familjeve kosovare.
Ai ka theksuar se kërkesa për ndryshim vjen çdo ditë nga qytetarët anekënd Kosovës, veçanërisht nga familjet, të rinjtë, punëtorët dhe pensionistët. Në fund të videos, Hamza ka përcjellur mesazhin: “T’i japim fund krizave. Ta ndryshojmë bashkë Kosovën!”.
Përditësime
PDK shtoi një citat të ri në fushatën e saj: “Kur kjo kërkesë vjen nga qytetarët, atëherë ndryshimi nuk është vetëm nevojë – është domosdoshmëri”.