Presidenti i Republikës, Bajram Begaj, është angazhuar për zgjidhjen e çështjes së një gruaje 34-vjeçare, e cila është ndaluar nga organet ligjzbatuese në aeroportin e Rinasit dhe është dërguar në burgun e Pojskës. E arrestuara po mbahet në ambientet e burgut së bashku me foshnjën e saj 7-muajshe.
Ndalimi i saj ka ndodhur pas një kallëzimi të bërë nga vjehrri për dhunë në familje. E reja është nënë e 3 fëmijëve të mitur, ku njëri prej tyre raportohet se vuan nga probleme shëndetësore.
Presidenti Begaj ka kërkuar informacione për të verifikuar nëse e reja përfiton nga amnistia aktuale. Në rast të kundërt, kreu i shtetit ka kërkuar nga Ministria e Drejtësisë një propozim zyrtar për amnisti personale, duke marrë parasysh gjendjen e saj familjare dhe praninë e foshnjës në qendrën e paraburgimit.