Shkrimtari Ben Blushi ka hedhur idenë për realizimin e një filmi ndërkombëtar kushtuar Skënderbeut, duke nënvizuar rolin që kinemaja luan në përforcimin e identitetit dhe vetëbesimit kombëtar. Duke iu referuar suksesit financiar të filmit Odisea, i cili i solli Greqisë mbi 50 milionë euro të ardhura gjatë këtij sezoni turistik, autori shprehet se edhe Shqipëria duhet t'i kthehet legjendave të saj.
Sipas Blushit, ndryshe nga Odisea që përfaqëson udhëtarin, Skënderbeu simbolizon mbrojtësin, një figurë tejet relevante në kontekstin aktual të migracionit. Ai vlerëson se historia e Skënderbeut si "Mbajtës i Hordhive" dhe "Pengues i Madh" mund të përcjellë një mesazh të fuqishëm për shoqëritë evropiane. Autori thekson se heroi ynë kombëtar arriti të mbronte qytetërimin evropian pa teknologji moderne, duke u mbështetur vetëm te besnikëria e rreth 10 mijë shqiptarëve.
Sa i përket financimit të këtij projekti, Blushi thekson se kostoja nuk duhet të shihet si pengesë e pakapërcyeshme. Ai propozon një fushatë mbarëkombëtare për të mobilizuar 7 milionë shqiptarë në mbarë botën. Sipas përllogaritjeve të tij, nëse secili prej tyre do të dhuronte mesatarisht 10 dollarë, do të grumbulloheshin 70 milionë dollarë, buxhet i cili mund të mjaftonte për një produksion me regjisor të njohur ndërkombëtar. Përveç kontributeve të qytetarëve, autori sugjeron se edhe biznesmenë dhe oligarkë do të kishin mundësi të mbështesin këtë nismë për të dëshmuar patriotizmin e tyre.