Iso-polifonia shqiptare dhe tingujt tradicionalë të fyellit dyjar janë bërë pjesë e kolonës zanore të filmit "The Odyssey", nën regjinë e Christopher Nolan. Kompozitori i filmit, Ludwig Göransson, zgjodhi të regjistronte tingujt autentikë në Shqipëri, duke shmangur orkestrat klasike për të përçuar më mirë atmosferën e poemës epike të Homerit.
Regjistrimet u zhvilluan në Teqenë e Kuzum Babait në Vlorë, me pjesëmarrjen e mjeshtrit të fyellit dhe culës dyjare, Vendim Kapaj. Procesi i punës, që zgjati rreth pesë orë, u karakterizua nga përkushtimi i lartë i ekipit të produksionit hollivudian. Në një intervistë për revistën "Vulture", Göransson rrëfeu përvojën e veçantë të punës me barinjtë shqiptarë, duke theksuar se regjistrimet duhej të përfundonin deri në orën 18:00, pasi barinjtë duhej të zgjoheshin në orën 04:00 për të kujdesur për bagëtinë.
Iso-polifonia, e cila bën pjesë në Listën e Trashëgimisë Kulturore Jomateriale të UNESCO-s, shoqëron një nga skenat kryesore të filmit, ku personazhi i Odisesë lundron me ushtrinë e tij. Filmi ka nisur shfaqjen në kinematë botërore dhe është pritur me vlerësime pozitive nga kritikët ndërkombëtarë. Ky realizim është ndarë në rrjetet sociale edhe nga Kryeministri Edi Rama, i cili shprehu krenarinë për faktin se vlerat kulturore shqiptare po gjejnë pasqyrim në produksionet më të mëdha të Hollywood-it.