Mesfushori shqiptar Kristjan Asllani vazhdon të jetë në qendër të vëmendjes së merkatos së verës, pasi Beshiktashi dhe Kaljari kanë rihapur bisedimet për sigurimin e shërbimeve të tij.
Beshiktashi, ku lojtari ka qenë më herët në formë huazimi, dëshiron ta mbajë përfundimisht 24-vjeçarin. Megjithatë, pengesa kryesore në negociatat me Interin mbetet vlerësimi financiar i kartonit, i cili kap shifrën e 11 milionë eurove. Drejtuesit e klubit turk po përgatisin një ofertë të re për të bindur zikaltërit që të ulin kërkesat e tyre ekonomike.
Në garë është rikthyer edhe Kaljari, klubi sard që më parë ishte tërhequr për shkak të kostos së lartë. Sipas raportimeve të së përditshmes italiane "Tuttosport", drejtuesit e Kaljarit besojnë se mund të arrijnë një marrëveshje nëse Interi pranon një formulë më të favorshme ose zbut pretendimet financiare.
Nga ana tjetër, Interi synon t'i përdorë të ardhurat nga shitja e Asllanit për të financuar ndërhyrjet në repartin e mesfushës. Një vendim përfundimtar nga klubi zikaltër pritet të merret gjatë javëve të ardhshme, varësisht nga planet teknike për sezonin e ri.