Besmir Beja, Drejtor i Përgjithshëm i Doganave, zhvilloi një inspektim në Degën Doganore Qafë Thanë për të ndjekur nga afër situatën pas bllokimit të qarkullimit në aksin rrugor Librazhd-Prrenjas. Ky bllokim, që zgjati disa ditë, ndikoi në lëvizjen e mjeteve të transportit, veçanërisht të kamionëve.
Gjatë vizitës, Beja u njoh me situatën aktuale dhe masat për menaxhimin e fluksit. Aktiviteti në pikën doganore po rikthehet gradualisht në normalitet me rifillimin e qarkullimit të rregullt të mjeteve.
Në prononcim gjatë inspektimit, Beja deklaroi: «Pas situatës së krijuar nga bllokimi i rrugës dhe vështirësive që pati qarkullimi i mjeteve të transportit, veçanërisht i kamionëve, puna në pikën doganore Qafë Thanë po rikthehet gradualisht në normalitet. Strukturat tona në terren kanë menaxhuar fluksin dhe vijojnë të garantojnë funksionimin e rregullt të procedurave doganore.»
Beja zhvilloi takime me drejtuesit dhe punonjësit e degës, ku u diskutuan funksionimi i procedurave doganore, menaxhimi i fluksit dhe ruajtja e standardeve të kontrollit e shërbimit.
Në kuadër të vizitës u mbajt një takim sensibilizues me stafin e Drejtorisë së Përgjithshme, pjesë e fushatës informuese në të gjitha degët doganore. Ky aktivitet zhvillohet në kuadër të vizitës së monitorimit nga DG TAXUD (Directorate-General for Taxation and Customs Union) dhe synon rritjen e ndërgjegjësimit të administratës doganore shqiptare për kërkesat dhe standardet e integrimit të Shqipërisë në Bashkimin Evropian.
Gjatë takimit u prezantuan prioritetet për përafrimin e legjislacionit dhe praktikave doganore me acquis-in e Bashkimit Evropian.