Pas lirimit nga burgu i Drenovës, Besmir Gjezari deklaroi për mediat se ndaj tij është ushtruar një proces i padrejtë gjyqësor. Ai ishte dënuar nga Gjykata e Korçës me 5 vite heqje lirie për veprën penale të prodhimit dhe shitjes së lëndëve narkotike, akuzë të cilën ai e mohon kategorikisht.
Gjezari ka drejtuar gishtin ndaj oficerit të policisë gjyqësore, Mariglen Beqo, duke pretenduar se ky i fundit ka ndikuar në çështjen e tij dhe në kufizimin e kontakteve me familjarët gjatë periudhës së vuajtjes së dënimit. Sipas tij, për më shumë se dy vite, ai nuk ka pasur mundësi të takojë familjen, përfshirë fëmijën e tij 3-vjeçar, për shkak të vendimeve të ndikuara nga ky oficer dhe nga prokurorja e çështjes.
Ish-i dënuari shprehu shqetësimin për sigurinë e tij dhe të familjes, duke pretenduar se ndihet i kërcënuar me jetë pas presioneve që pohon se ka përjetuar nga persona të sistemit të drejtësisë. Gjezari paralajmëroi se do të ndjekë të gjitha rrugët ligjore për të provuar pafajësinë dhe për të kërkuar zbardhjen e rrethanave që çuan në dënimin e tij.
Deri në këtë moment, pretendimet e ngritura nga Besmir Gjezari mbeten deklarata publike. Nuk ka ende një reagim zyrtar nga ana e Prokurorisë së Korçës, nga oficeri i policisë gjyqësore Mariglen Beqo, apo nga institucionet e tjera përkatëse lidhur me akuzat e bëra për ndikim të paligjshëm dhe mohim të të drejtave të të burgosurve.