Ferit Hoxha u emërua ministër i Jashtëm me vendim të kryeministrit Edi Rama, duke zëvendësuar Elisa Spiropalin. Emërimi u njoftua pasditen e 26 shkurtit 2026.
Ish-ministri i Jashtëm Besnik Mustafaj reagoi në një postim në Facebook, duke e uruar Hoxhën për detyrën e re. Mustafaj e cilëson Hoxhën si "koleg të hershëm" dhe kujton se e përfshiu në rrethin e ngushtë të bashkëpunëtorëve të tij, duke i dhënë "shtysën e parë të madhe" në karrierën diplomatike.
"Si koleg i hershëm, por edhe si ministër që e përfshiva në rrethin e afërt të bashkëpunëtorëve të mi duke i dhënë shtysën e parë të madhe karrierës së tij, i uroj përzemërsisht suksese Ferit Hoxhës. Me këtë rast shpreh shpresën se një nga aktet e tij të para si ministër do të jetë revokimi i Ligjit për Shërbimin e Jashtëm, votuar së fundmi në Parlament, si një ligj që godet rëndë integritetin e trupës diplomatike të Republikës së Shqipërisë", shkruan Mustafaj.
Ferit Hoxha ka një karrierë të gjatë në shërbimin diplomatik shqiptar. Ai ka mbuluar më parë marrëdhëniet e Shqipërisë me Bashkimin Evropian, ka shërbyer si këshilltar në Organizatën e Kombeve të Bashkuara dhe në vende të tjera. Konkretisht:
• Nga marsi 2018 deri në tetor 2021, shërbeu si Ambasador dhe Dërguar i Përhershëm i Shqipërisë në UNESCO, në Paris.
• Nga 30 shtatori 2021, u emërua Ambasador dhe Përfaqësues i Përhershëm i Shqipërisë në Kombet e Bashkuara në Nju Jork, si dhe Ambasador Jo-rezident në Kubë.