Qeveria shqiptare bëri ndryshime në kabinet, ku Ferit Hoxha u emërua ministër i Jashtëm në vend të Elisa Spiropalin. Lajmi u komentua nga eurodeputeti Fredi Beleri në emisionin "Off the Record" të drejtuar nga Andrea Danglli në A2CNN.
Ferit Hoxha lindi më 22 shkurt në qytetin e Shkodrës. Ai u diplomua në vitin 1988 në Fakultetin e Gjuhëve të Huaja, degën Gjuhë dhe Kulturë Frënge në Universitetin e Tiranës. Gjithashtu ka diplomë nga Instituti Holandez i Marrëdhënieve Ndërkombëtare Clingendael në Hagë.
Karrierën diplomatike e nisi në vitin 1991 në Ministrinë e Punëve të Jashtme. Në vitin 1998 u emërua ambasador i jashtëzakonshëm dhe fuqiplotë, shef i Misionit të Republikës së Shqipërisë pranë Bashkimit Evropian në Bruksel, post që e mbajti deri në vitin 2001. Midis viteve 2001-2006 shërbeu si ambasador pranë Republikës Franceze në Paris, ndërsa në vitet 2003-2006 ishte ambasador pranë Republikës Portugeze me rezidencë në Paris. Nga viti 2006 deri në 2009 kreu detyrën e sekretarit të përgjithshëm të Ministrisë së Punëve të Jashtme. Në vitin 2009 u emërua ambasador i Shqipërisë në Organizatën e Kombeve të Bashkuara, si dhe i akredituar për Kubën.
Fredi Beleri vlerësoi emërimin e Hoxhës duke thënë se ai është "një diplomat i nderuar këtu në Bruksel, një njeri që i bën nder Shqipërisë". Beleri shprehu shpresën që Hoxha të jetë një ministër i Jashtëm i mirë, "po të lihet të bëjë punën". Ai theksoi se në Shqipëri figura të caktuara ndikojnë në drejtësi dhe vendimmarrje.
Sa i përket integrimit europian, Beleri deklaroi se në një diskutim të fundit në Bruksel ka qenë "deputeti më pro shqiptar". Ai përmendi se Shqipëria ka probleme që nuk duhen fshehur "nën rrogoz" për të ndihmuar anëtarësimin në Bashkimin Evropian. Beleri, që ka ndarë jetën mes dy shteteve, u shpreh si më i interesuari për hyrjen sa më të shpejtë të Shqipërisë në BE.