Presidenti Bajram Begaj dekretoi të mërkurën ministrat e rinj me propozim të Kryeministrit dhe dërgoi dekretet në Kuvendin e Shqipërisë për shqyrtim. Ky veprim përfshin 7 ndryshime në kabinetin qeveritar. Procedura kushtetuese vazhdon me miratimin e programit qeveritar dhe përbërjes së Qeverisë nga Kuvendi, pas së cilës ministrat do të betohen në Presidencë.
Ndër dekretet e lëshuara dallohet lirimi i Ferit Hoxhës nga detyra e Ambasadorit të Jashtëzakonshëm dhe Fuqiplotë të Shqipërisë pranë Bashkimit Evropian, rezident. Presidenca njoftoi se ky dekret hap rrugën për emërimin e tij si Ministër i Jashtëm, duke zëvendësuar Elisa Spiropalin.
Biografia e Ferit Hoxhës
Ferit Hoxha u bashkua me Shërbimin e Jashtëm të Shqipërisë në vitin 1991. Ai ka mbajtur poste të rëndësishme, si:
- Mbuloi marrëdhëniet me BE-në në Ministrinë e Punëve të Jashtme nga 1991 deri në 1995.
- Këshilltar në Misionin e Shqipërisë në Kombet e Bashkuara në Nju Jork në 1995.
- Drejtor i Marrëdhënieve Multilaterale nga 1996 në 1998.
- Ambasador në BE, Belgjikë dhe jo-rezident në Luksemburg nga 1998 në 2001.
- Ambasador në Francë dhe jo-rezident në Portugali, Algjeri e Monaco nga 2001 në 2006.
- Sekretar i Përgjithshëm i Ministrisë së Punëve të Jashtme nga 2006 në 2009, Koordinator Kombëtar për Aleancën e Civilizimeve dhe Guvernator në IAEA (2007-2008).
- Ambasador dhe Përfaqësues permanent në OKB në Nju Jork dhe jo-rezident në Kubë nga 2009 në 2015.
- Drejtor i Përgjithshëm për Çështje Politike dhe Strategjike në Ministrinë për Evropën dhe Punët e Jashtme nga 2015 në 2018.