Ish-presidentja e Republikës Sërpska, Bilana Plavshiq, e cila ndërroi jetë më 1 tetor në Beograd në moshën 96-vjeçare, u përcoll për në banesën e fundit më 7 tetor në Banjallukë. Ceremonia e varrimit u shoqërua me nderime të larta shtetërore, ku arkivoli ishte i mbuluar me flamurin e Republikës Sërpska dhe u shoqërua nga Garda e Nderit e Ministrisë së Punëve të Brendshme.
Në varrim dhe në ceremoninë përkujtimore të mbajtur më herët në Banski Dvor, morën pjesë figura kyçe të politikës serbe të Bosnjës, si anëtarja e Presidencës së Bosnje e Hercegovinës, Zhelka Cvijanoviq, ish-presidenti Millorad Dodik, si dhe udhëheqës të Parlamentit dhe Qeverisë së entitetit, mes të cilëve Nenad Stevandiq, Sinisha Karan dhe Savo Miniq. Pavarësisht nderimeve, asnjë zyrtar nga Serbia nuk mori pjesë në këto aktivitete.
Bilana Plavshiq ishte dënuar në vitin 2003 nga Gjykata Penale Ndërkombëtare për ish-Jugosllavinë (ICTY) me 11 vjet burgim. Ajo pranoi fajësinë për pjesëmarrje në një politikë të organizuar të ndarjes etnike gjatë vitit 1992, e cila shkaktoi dëbimin dhe vdekjen e mijëra boshnjakëve dhe kroatëve në 37 komuna të Bosnjës. Aktgjykimi konfirmoi rolin e saj në mbështetjen e spastrimit etnik dhe dështimin për të parandaluar krimet ndaj popullsisë joserbe.
Kjo ceremoni vjen në një kohë kur legjislacioni në Bosnje e Hercegovinë, i miratuar përmes ndryshimeve në Kodin Penal të imponuara nga ish-përfaqësuesi ndërkombëtar Valentin Inzko, ndalon rreptësisht glorifikimin publik të personave të dënuar për krime lufte. Ligji parasheh dënime me burgim prej të paktën tre vjetësh për këdo që ofron mirënjohje ose privilegje për kriminelë të dënuar. Prokuroria e Bosnjës nuk ka dhënë ende një qëndrim zyrtar mbi mënyrën se si do të procedohet pas këtyre nderimeve shtetërore.