Dokumentet e siguruara nga BIRN sugjerojnë se Ministria e Infrastrukturës dhe Energjisë ka marrë përsipër risqe financiare shtesë në favor të kompanisë koncesionare të aeroportit të Vlorës gjatë negocimit të kontratës, pavarësisht rekomandimeve të Ministrisë së Financave.
Më 20 prill 2021, kryeministri Edi Rama përshëndeti nënshkrimin e kontratës koncesionare në një ceremoni, ku deklaroi: "…Belinda e di shumë mirë, në një moment të caktuar unë fillova t’i them ‘nuk ka mundësi, ka një mallkim’. Dikush e ka mallkuar këtë projekt, sepse sapo zgjidhnim një problem, lindte një tjetër." Kontrata u firmos nga ministrja Belinda Balluku dhe përfaqësuesi i konsorciumit fitues, me praninë e Edi Ramës dhe biznesmenit Behgjet Pacolli. Ky nënshkrim ndodhi në prag të zgjedhjeve parlamentare të 25 prillit 2021.
Pas pesë vjetësh, aeroporti nuk është përfunduar ende dhe përballet me një konflikt gjyqësor të ashpër mes aksionerëve, si dhe paditë penale për manipulim dhe mashtrim mes tyre.
Rreziqet financiare për shtetin
Dhjetra dokumente të analizuara nga BIRN tregojnë se, përveç të ardhurave të garantuara prej 138 milionë eurosh, buxheti shtetëror rrezikon detyrime shtesë prej dhjetra milionë eurosh në rast zgjidhjeje parakohshme të kontratës. Këto riske përfshijnë pagesën nga shteti të huave të marra nga kompania koncesionare në banka, në kundërshtim me rekomandimin e Ministrisë së Financave.
Letërkëmbimi intensiv mes Ministrisë së Infrastrukturës dhe Energjisë dhe Ministrisë së Financave ndodhi në datat 16-19 prill 2021, tre ditë para ceremonisë së nënshkrimit.