Bllokimi i aksit Librazhd-Përrenjas, që zgjat prej 5 ditësh, ka ndryshuar itinerarët e mjeteve të transportit ndërqytetas nga Terminali i Juglindjes në Tiranë drejt qyteteve të Juglindjes, Korçës dhe Pogradecit.
Furgonat dhe autobusët deviojnë tani përmes rrugës Elbasan-Cërrik-Gramsh-Maliq. Kjo ka zgjatur kohën e udhëtimit deri në 2 orë më shumë. Për shembull, itinerari Tiranë-Korçë, që më parë zgjaste rreth 3 orë, tani arrin në mbi 4 orë, në varësi të trafikut dhe ngarkesës në segmentet alternative.
Çmimi i biletave është rritur deri në 40% për shkak të devijimeve dhe kohës shtesë. Dashnor Memaj, kryetar i Shoqatës së Transportit Ndërqytetas, deklaroi se lëvizjet drejt Korçës dhe Pogradecit vazhdojnë rregullisht, por mjetet bashkohen me linjat ekzistuese pas devijimeve.
Lëvizja drejt Përrenjasit me furgonë nga operatorët privatë të licencuar nuk kryhet, jo për mungesë rrugësh alternative, por për fluks shumë të ulët pasagjerësh. Në Terminalin e Juglindjes nuk ka ndryshime në oraret e nisjeve për destinacionet e tjera.