Rihapja e segmentit Librazhd-Prrenjas në aksin kombëtar Tiranë–Elbasan–Librazhd–Pogradec–Korçë ka rikthyer fluksin e madh të automjeteve drejt zonave turistike si Pogradec dhe Korçë. Kjo ka ndodhur pasditen e së premtes, 6 mars 2026, në një nga arteriet kryesore që lidh kryeqytetin me juglindjen e vendit.
Prej orës 15:00, qindra deri në mijëra automjete kanë nisur lëvizjen nga Tirana, duke shkaktuar ngadalësim të qarkullimit dhe radhë kilometrike në disa segmente. Situata është e rënduar veçanërisht nga Tuneli i Krrabës drejt Dopajt dhe Hinkës së Shijonit, ku trafiku është bërë i vështirë për shkak të volumit të lartë.
Për të menaxhuar situatën, shërbimet e Policisë Rrugore të Drejtorisë Vendore të Elbasanit janë vendosur në terren për të disiplinuar trafikin dhe parandaluar bllokimet. Në drejtimin e kundërt, qarkullimi mbetet normal për momentin.
Fluksi i lartë pritet të vazhdojë gjatë fundjavës dhe të rritet pasditen e së dielës, me kthimin e pushuesve drejt Tiranës.