Situata në kantierin e ndërtimit të Aeroportit të Vlorës është tensionuar sërish gjatë orëve të mëngjesit të kësaj të marte. Kamionë që mbajnë logon e kompanisë 2A Group, në pronësi të Valon Ademit, janë pozicionuar në hyrjen kryesore, duke penguar aksesin e punonjësve dhe mjeteve të kontraktuara nga kompania MABCO.
Sipas informacioneve nga terreni, në momentet e para të konfrontimit, disa nënkontraktorë të MABCO-s arritën të hynin në ambientet e brendshme, por hyrja u mbyll sërish nga mjetet e rënda. Raportohet se një prej kamionëve të përdorur për bllokimin e rrugës ishte pa targa. Ky incident është pjesë e një mosmarrëveshjeje të vazhdueshme midis MABCO dhe 2A Group lidhur me administrimin dhe ecurinë e projektit të aeroportit.
Forcat e policisë janë angazhuar në zonë për të mbikëqyrur zhvillimet, ndërsa bllokimi i hyrjes po ndikon drejtpërdrejt në vonesat e punimeve. Konfliktet midis palëve janë shfaqur periodikisht gjatë javëve të fundit, duke ndërlikuar vazhdimësinë e punës në këtë infrastrukturë strategjike.