Ministria e Infrastrukturës dhe Energjetikës (MIE) ka ndërhyrë zyrtarisht në situatën e krijuar në kantierin e Aeroportit të Vlorës, ku punimet kanë ndaluar për shkak të mosmarrëveshjeve mes kompanive koncesionare MABCO dhe 2A Group. Përmes një shkrese zyrtare, ministri Enea Karakaçi ka kërkuar zgjidhjen e këtij ngërçi brenda një periudhe 30-ditore.
Në dokumentin e përcjellë palëve, ministri thekson se interesi publik i këtij projekti kombëtar është primar dhe nuk mund të cenohet nga konfliktet private të ortakëve. MIE shprehet e gatshme të bashkëpunojë për përmbushjen e kontratës, por paralajmëron se nëse palët nuk arrijnë një marrëveshje brenda afatit të përcaktuar, shteti do të ndërmarrë veprime ligjore dhe kontraktuale për të garantuar vijimin e punimeve.
Ky zhvillim vjen pas një vendimi të fundit nga Gjykata e Lartë, e cila rrëzoi kërkesën e kompanive VIA dhe 2A Group për marrjen e një mase sigurimi ndaj shoqërisë MABCO. Gjykata prishi vendimin e mëparshëm që kishte pezulluar të drejtën e votës dhe të drejtat e tjera të MABCO-s brenda kompanisë Vlora International Airport.
Përditësime
Biznesmeni Valon Ademi, drejtues i 2A Group, ka zbardhur prapaskenat e konfliktit që ka çuar në ultimatumin 30-ditor të Ministrisë së Infrastrukturës për Aeroportin e Vlorës. Sipas Ademit, mosmarrëveshja ka lindur nga mosregjistrimi në QKB i një kontrate noteriale, e cila parashikonte rritjen e aksioneve të 2A Group nga 2% në 49%. 2A Group ka akuzuar kompaninë MABCO për vënien e një vetoje të njëanshme, e cila ka sjellë pezullimin e kontratave në fuqi.