Ministri i Infrastrukturës dhe Energjisë, Enea Karakaçi, deklaroi pas mbledhjes së Këshillit të Ministrave se qeveria mbetet e angazhuar për përfundimin e projektit të Aeroportit të Vlorës brenda afateve të parashikuara. Ministri konfirmoi se i është drejtuar zyrtarisht ortakëve të koncesionit me një shkresë, ku kërkohet që konfliktet e tyre civile të mos bëhen pengesë për operimin e aeroportit.
Sipas Karakaçit, për çdo ditë vonesë në zbatimin e punimeve janë aplikuar penalitetet përkatëse. "Ne kemi lëshuar faturat e para të penalitetit për vonesat përkatëse", u shpreh ministri. Qeveria është shprehur e gatshme të ndërhyjë për të ndihmuar palët në gjetjen e një gjuhe të përbashkët, megjithatë, mbajtja e afatit 30-ditor mbetet kusht për zgjidhjen e situatës.
Projekti, i cili prej shtatorit të vitit të kaluar është përfshirë në mosmarrëveshje tregtare mes aksionerëve kryesorë, vlerësohet si një investim strategjik. Pavarësisht këtyre përplasjeve që kanë ndikuar në imazhin e projektit, ministri theksoi se punimet në aeroport kanë avancuar dhe se qeveria do të marrë të gjitha masat e nevojshme për ta bërë atë operacional sa më parë.