Tedi Blushi, sekretar i përgjithshëm dhe deputet i Partisë së Lirisë, u bëri thirrje kolegëve në Kuvend për të miratuar me urgjencë projektligjin e depozituar gati dy javë më parë nga grupi parlamentar i kësaj force politike për uljen e çmimit të karburanteve.
Sipas Blushit, nuk ka pasur asnjë reagim nga kryeministri Edi Rama dhe mazhoranca parlamentare. Ai e cilësoi këtë heshtje si të pajustifikueshme përballë një problemi që prek familjet dhe bizneset shqiptare, veçanërisht në kushtet e përshkallëzimit të konfliktit në Lindjen e Mesme, i cili pritet të ndikojë në rritjen e çmimit të karburanteve në Shqipëri.
Blushi deklaroi se çmimi aktual i naftës ka arritur rreth 200 lekë për litër, ndërsa mbi 60% e këtij çmimi përbëhet nga taksa që kalojnë në buxhetin e shtetit. Ai argumentoi se ulja e taksave aplikohet në vende të Europës Perëndimore dhe në rajon, duke ndikuar drejtpërdrejt në xhepin e qytetarëve.
Projektligji parashikon pezullimin e Taksës së Qarkullimit dhe të Taksës së Karbonit, masë që, sipas Blushit, do të çonte në ulje të menjëhershme të çmimit të karburanteve. Deputeti e prezantoi nismën si provë për deputetët, duke i sfiduar ata të zgjedhin midis interesave të qytetarëve dhe atyre të tjera. Ai përmendi se qytetarët paguajnë 27 lekë për litër taksë qarkullimi, që me TVSH arrin rreth 32 lekë, dhe paguajnë dy herë për rrugët përmes taksës së regjistrimit.
Përditësime
Blushi akuzoi mazhorancën rilindase se është "marrë peng nga oligarkët e babëzizuar të naftës".
Ai shtoi se projektligji për uljen e çmimit të karburanteve është "e vetmja politikë reale që ndihet në xhepin e qytetarit".