Buxheti i shtetit arkëtoi 24.2 miliardë lekë, apo rreth 250 milionë euro, në vitin 2025 nga taksa e qarkullimit mbi karburantet, sipas të dhënave të Ministrisë së Financave dhe Doganave. Kjo taksë paguhet nga përdoruesit e automjeteve për çdo litër benzine ose nafte, në shumën fikse prej 27 lekësh për litër pa TVSH.
Ky është niveli më i lartë i të ardhurave të arkëtuara ndonjëherë nga kjo taksë, me rritje 13.6% krahasuar me 2024-n dhe gati 30% më shumë se në 2019. Rritja erdhi nga konsumi rekord prej 740 mijë tonësh karburante në vend.
Taksa e qarkullimit u vendos në 2012 me 7 lekë për litër dhe u rrit gradualisht deri në 27 lekë për litër në 2015, ku mbetet e pandryshuar. Ajo mblidhet për përdorimin dhe mirëmbajtjen e rrjetit rrugor, por burimet theksojnë mungesë transparence në përdorimin e saj dhe mirëmbajtje të dobët të rrugëve, sidomos në nyjen qendrore midis Tiranës dhe Durrësit.
Çmimet e karburanteve në Shqipëri janë të paktën 30% më të larta se në vendet e rajonit. Sipas Global Petrol Prices (deri në 23 mars), vendi renditet i 13-i më i shtrenjti në botë, me çmimin e naftës të barabartë me atë në Gjermani, Suedi e Holandë, pavarësisht të ardhurave më të ulëta për frymë. Një qytetar shqiptar shpenzon 7.2% të të ardhurave ditore për një litër naftë, dy herë më shumë se mesatarja rajonale. Holanda ka naftën më të shtrenjtë absolutisht në Europë, por barrën relativë më të ulët.