Deputeti i Partisë së Lirisë, Tedi Blushi, shprehu sot në një konferencë për shtyp, bashkë me avokatët mbrojtës, se nuk është zbatuar asnjë rekomandim i Avokatit të Popullit për rastin e ish-presidentit Ilir Meta, i paraburgosur që nga 21 tetori 2024 me urdhër të SPAK.
Blushi theksoi se Avokati i Popullit ka përpiluar një raport me rekomandime specifike për kushtet e burgimit të Metës, por asnjë prej tyre nuk është zbatuar. "Nuk është marrë asnjë masë. I jam drejtuar Ministrit të Drejtësisë dhe Drejtorit të Përgjithshëm të Burgjeve, por asnjë përgjigje", deklaroi ai.
Ai vuri në dukje shkelje të rënda në burgje, ku Metës nuk i lejohet ajrosja ditore, një të drejtë e garantuar nga konventat ndërkombëtare për të gjithë të paraburgosurit. "Edhe tek ajrosja janë vendosur kufizime. Të gjithë të paraburgosurit e bëjnë çdo ditë ajrosjen, kurse zoti Meta jo, është i vetmi që nuk e bën", shtoi Blushi.
Sipas tij, komunikimi me Metën është i pamundur për shkak të kufizimeve të SPAK. Si Sekretar i Përgjithshëm i Partisë së Lirisë, Blushi nuk mund të komunikojë me të, as deputetët e as eurodeputetët, pavarësisht garancive ligjore dhe të Konventave Evropiane. Meta mbahet i izoluar në kushte të rënda.